Nationaltag vo Mexiko

Vom 13. bis am 16. September isch in Queretaro voll vill los gsi. Alli Luet sind im Stadtzentrum gsi, es het Z´Aesse ge (niammiii!) und verschedeni kulturelli Events, d´Stimmig isch eifach super gsi! Am beste het mer de 13. September gfalle, oeppe 200 Luet verchleidet als Chichimecas (Indianerstamm vo Queretaro) hend ide Strasse tanzet. (Video)
Am 14. September hend alli Schueler vode Marista muesse es rots, wisses oder gruens T-Shirt alegge - Farbe vo de Flagge vo Mexiko :-) ich han es wiisses Shirt aka. Am Namitag hets e Fiesta Mexicana ge, natuerli met Tanz und Esse wie immer.
Am Samstig Abig ben ich met mim Vater undem Oscar "El grito de la independencia" ga luege. El gobernador vo Queretaro het en Red ghalte und grueft: ¡Viva Hidalgo! ¡Viva Mexico! ¡Viva Queretaro! und alli hend s Gliiche grueft. Am Schluss het er d´Glocke luete la und sie hend d Nationalhymne abspielt. Es het es mega Fuerwerch ge. Isch no idruecklich gsi! D´Mexikaner sind mega patriotisch.
Am Sunntig hets en Umzug ge. Min Mex-Vater het au met gmacht. Waerhend dem de Oscar und ich druf gwartet hend dasses afat isch ploetzli es chlises Chind cho und het mer mega fest a de Haar zoge, hehe. De Oscar und ich hend so en Lachafall becho, herrjeee...hehe. Schlussendlich, oeppe 30 minute zspat, het de Umzug agfange. Poliziste, Fuerwehr Luet, s Rote Chruez und verschedeni Schuele send metgloffe. Ich has echli oebertribe gfunde, es sind mega Panzer dure gfahre und d´Schueler sind wie Soldate marschiert. Han i dene Taeg sehr vill Neus gse.

La familia

Ich han zwoi Bruedere: de Oscar (17ni) und de José Luis (15ni). Min Vater heisst au José Luis, er isch Fuessballlehrer anere Schuel. Mini Mueter heisst Consuelo und isch Huusfrau. D´Familie isch sehr ruhig und bescheide. Bis jetzt gfallts mer guet, ich han min eignige Fernseh i mim Zimmer. Es choemed mega vell gueti Serie wie: What about Brian, Gilmore Girls, Scrubs, Desperate Housewives, Friends, O.C., etc. MTV hets au..so ich han da en super Unterhaltig! Mexikanische Telenovelas chani ned luege, die send zu dramatisch. Mer essed immer am 3 und denne so geg die 9ni nomol, und woerkli vill, sie stopfet mich voll! Ide noechi vomim Huus hets es Fitness-Center, so ich gang dete min Mexiko-Buch ga reduziere. hehe. Ich han scho ganz velli Verwandti kenneglernt, es sind so vill dass ich mich garnoemm alli Naeme mag erinnere. Mini Grossmueter Royma isch en mega herzigi, mega lieb und sie redet so vill :-) suess.

(Fotti: Lulu (Tante), Oscar, Royma, Ich, Consuelo, José und José)

La escuela

Min erste Schueltag isch also am 4.September gsi. Ich bin mega nervoes gsi, ich han am liebste grad weder hei welle. E neui Schuel, i eme neue Land met ere andere Kultur und e anderi Sprach, es hend mich alli mega agstarrt. Zum Glueck beni ned alei gsi, die andere Ustuschschueler sind au dete gsi. Ich be met emThomas vo Belgie it Klass 3D iteilt wurde, er isch en mega ufgstellte und liebe, isch also super! I minere Klass simmer oeppe 30 Luet. Sie sind woerkli chindisch, han recht en Schock ka. Jetzt aber nach 3 Wuche hani mi scho dra gwoehnt. Sie sind halt chindisch aber defoer mega lieb. D´Nabile, d´Sara und d´Lety kuemmeret sich immer um mich. Au teilet sie alles, wenn oepper oeppis zum esse chauft, isches selbstverstaendlich dass alli doefet ha, sodass am Schluss die Person fast nuet ka het. Mega vill Kolleginne choemed mengisch eifach und drucked mir Guetzli i Hand, mega suess! Alli teilet alles. Waehrend de Stunde lost niemert em Lehrer zue (ussert i de Physik und Mathistund, det sends schoen brav), sie mached woerkli die ganz siit nur scheiss, hehe. Ich glaube dSchuel selber isch ned so schwer, chas aber nonig so beurteile, will ich nonig so vill vertsta. Mini Schuelfaecher: Fisica (5h), Matematicas (5h), Individuo y Sociedad (4h), Cultura Regional Historia de Queretaro (3h), Historia de Mexico (3h), Informatica (3h), Literatura (3h), Actividades Deportivas (2h), Instruccion Religiosa (2h), Orientacion Educativa (2h) und Ingles (3h). D´Schuel fat am 7ni a und hoert am 2 uf. Es isch schoen eifach mal es Jahr ohni Schuelstress :-)

1 bis 3 September

Das isch etz also min erste Itrag. Es isch mini 3ti Wuche da in Queretaro, ich bin am Fritigabig acho, alli Ustuschschueler vo de ganze Welt hend sich in Cuernavaca versammlet. Ich han mis eignige Hotelzimmer ka, eini vode wenige, die meiste hend i eme Masselager gschlafe, also ich han mega Glueck ka! Am Samstig hets verschedeni Aktivitaete ge alsVorbereitig ufs Ustuschjahr und am Abe en FIESTA MEXICANA, es isch uu cool gsi, alli hend tanzt! Es het mega vill Asiate ka, sie so suess gsi. Am Sunntig Morge bin ich metem Bus nach Mexico City und vo dete us denne metem Bus nach Queretaro, zwoi e halb Stund. Ich bin die ganzi Fahrt mega nervoes gsi und han mich gfraget was ich eigentli mache. Am 4i simmer denne in Queretaro acho, mer sind 7 Ustuschschueler gsi: Oriane (Frankrich), Guri (Norwege), Teresa (Tschechie), Melissa(Neuseeland), Katrin (Duetschland) und Thomas (Belgie). Eusi Gastfamilie hend a de Busstation gwartet, ich han zwoi Plastikrose vo mine Gastbruedere becho, mega herzig! Alli sind nacher is Huus vo minere Koordinatorin Emma, dete hets es Willkommens-Esse ge. Han ned vill choene esse, will ich so ufgwuehlt gsi bin. Am 7ni sind alli hei. Mini Familie Ulloa Calzada het mer denne sHuus zeiget. Bis am 9ni oeppe han ich no echli met ihne gredet, das isch no luschtig gsi, will ich ja ned vill spanisch han choene. Ich bin uu mued gsi, bin also sofort igschlafe a dem abe. Defuer bin ich mega frueh ufgwacht am Morge und han mich so schlecht gfuehlt, han so Heimweh ka. Ich han mich muesse zemerisse, bin also ufgstande, ga dusche und han z morge g´esse met miner Mueter. Am Nomitag ben met ihre mini Schueluniform ga chaufe: Marinblaui Hose, en wissii Bluuse - denne hets no en Sportuniform met blaue Trainerhose und es blaus oder graus Poloshirt. D´Schueluniform gfallt mir voll. Am Zischtig isch denne min erste Schueltag gsii...